Panchhi

Panchhi by Bubbles Kandhari

Aaj main baithi chhat pe apne

Panchhiyon ka yun chehekna sunte.

Choon choon karte jaa rahi unki toli

Kitni mithi thi unki boli.

Alfaz hona zaroori toh nahin

Manmohit hai unki madhur mausiki.

Udaan bharte khule aasman mein

Pankh phailaye aazad jahan mein.

Samay sandhya ka suraj apni dhalaan pe

Panchhi udh rahe hain, per ek hi katar mein.

Bharosa hai unhein apne quayud per

Quayud ko yakeen hai kaynaat per.

Poochha apne aap se jhank ke ander

Kya tujhe bharosa hai oos Khalik per?

Nazren jhuk gayin, sharmindgi ka ehsaas hua

In parindon se kyon leh paaye, hum yeh seekh na.

Aai insaan tujhe kya hua hai, duniya ke toofan mein

Kyon bikhre hue ho tum, yun is haal mein

Kyon na chhod ke bhed bhao apne

Pyaar ki mithi boli bolen.

Mil baith ke hum ek qatar mein

Is aalam ko gulistan banayen.