Na Jaane Kub Hum Bade Ho Jaate Hain

Na Jaane Kub Hum Bade Ho Jaate Hain - by Bubbles Kandhari

Na jaane kub hum bade ho jate hain

Kub din mahine saal guzar jaate hain

Dheere dheere apne bhi chod jaate hain

Na jaane kub hum bade ho jate hain.

Bachpan se jawani ka safar toh hai pyaara

Lekin kahan yeh sada rehta hamara

Khud ko samajh nahi aati hai

Zindagi kis raftar se guzar jaati hai.

Dil toh shayad abh bhi jawan hai hota

Jism vaisa abh saath nahin deta

Dekh kur bachpan ki tasveerein

Hairan se ho jaate hain

Phir purani yaadon mein

Achanak se kho jaate hai.

Hulki si muskaan honthon pe aa jati hai

Kaise the hum kaise bun jaate hai

Na jaane kub hum bade ho jaate hain.

Chehre pur jub hulki hulki

Jhuriyan aa jaati hain

Samay ke badalte mausam

Chaap apni chod jaate hain

Na jaane kub hum bade ho jaate hain.

Baalon ki kaali siyahi

Ab chaandi si bun jaati hai

Kanon se ab sunte kum hai

Nainon se kum dikhta hai.

Yeh khut tow aate hai khuda se

Pur palle kuch nahi padta hai

Waqt ka paiyya chalta raha

Hum massaiylon mein ghir jaate rahe.

Phursut bhi na mili

Khayal bhi na aaya

Zindagi ke is safar mein

Humne kya khoya kya paaya.

Phir kisi ek mod pe

Na jaane apne kub bichad jaate hai

Khuda umar tarash kare unhein

Jis din mata-pita apne

Yeh duniya chod jaate hain

Oos din, oos samay, oos pul

Hum vakai bade ho jaate hain.