Gulaab Ki Zubani

Gulaab Ki Zubani by Bubbles Kandhari

Dali se na todon mujhko

Gulistan mein mehek phailayee hai

Aate jaate sabhi logon par

Ishq-ae-mushk barsaee hai.

Todoge jab mujhko dali se

Kaante bhi saath aayenge

Sugandh jab meri aayegi

Kaanton ki chubhan bhi paoge.

Todke jab ghar le jaoge mujhko

Bas ek hi ke liye reh jaonga

Kuch din palak jhapakte yoohin

Mera roop-rang ud jayega.

Rehne dein mujhe baageche mein

Maali ne jise pyaar se seencha

Apne khoon paseene se.

Logo mein khushboo phailaaoon

Pyaar ka pratik ban jaoon

Kaante bhi jahan lage pyaare

Aise baghban mein khilta jaoon.